Gen 35 | ATA | STEP | Xe Lataua muavuti la muvikalanu Iakovo aloxo 'o, “Nalutu mo navulasou tuala ano 'o, ia nalai mo naxolu ne Veteli mo natulusou valovalo sou na'elaxa'a ta sipsip utelo noxilo. Eni Lataua e epala'a noxine no voxo ane nini ne'umolu vivine Esau la nene'e netatalume.”

a 35:1Tav 28:11-17

b 35:10Tav 32:28

e 35:22Tav 49:4

f 35:27Tav 13:18

Genesis 35

Iakovo Mulivu Mulai ne Veteli

1 ^aXe Lataua muavuti la muvikalanu Iakovo aloxo 'o, “Nalutu mo navulasou tuala ano 'o, ia nalai mo naxolu ne Veteli mo natulusou valovalo sou na'elaxa'a ta sipsip utelo noxilo. Eni Lataua e epala'a noxine no voxo ane nini ne'umolu vivine Esau la nene'e netatalume.” 2 Iakovo mulomu noxou Lataua aloxo ne xe mukalu, la muvikalane'i ta 'olu ilo'a ta semasemai'a mo ta 'ili'ili'a mo ane'i ta mitema latala e ilo'a ikekei ne aloxo 'o, “Ngingi latala 'o ne maasi la ngaxexene'i ta maliava sou kalavoi noxinge latala ne ukalusi, mo ngaxali malemalenga ukalusi mo ngatokolomo no anu tokolomo alavua ukalusi, 3 xo nenge asou tasuku sou tuala ano 'o ia talai ne Veteli sou eni atulusou valovalo sou a'elaxa'a ta sipsip ilai noxou Lataua no anu. Lataua e musu'ulileli no anu tu'umaxu ane muxali noxilo xe muxolu noxilo sou musaxila'ilo no xalexalee tuatuala ane eni emumuamua'i no anu.” 4 Xe ta motu miavuti la milai mitavulene'i ta maliavai'a sou milailixa'a noxou Iakovo. Mo paxoxo sou sangasangali'a kalumo ne milaxalaxalixu sou milosou sou mi'asixa'a no ovu tavuna tava'u 'alai ne Sikemu. 5 Xe mukalu la sou ane'i Iakovo ilo'a ta 'olu milutu sou milai. Milutu sou milai, la Lataua muxalixu 'ume toxoxa'a noxi'a ta mitema ane mixolu no nano no tuala tatatila 'alai ne Sikemu, opone'i mole ilelemuline'i ua. 6 Mimuamua'i xoo, la milai mixali ne Lusu. Vaimomo 'o ane'i ilemolu tuala ane ne lexe Veteli. Anu tuala ane ne muxolu no xalee lia ne Kanani. 7 Milai mixolu ane sou anu mutulusou valovalo sou u'elaxa'a ta sipsip ane. La sou mulemolu lia xalee ane Veteli ne lexe, “Lataua sou Veteli” Xo Lataua mupala'a noxou no voxo ane anu mu'umolu vimou Esau la mulai mutalume no anu. 8 Milai mixolu ane, la sou Debora sema tila e misusune Liveka no molomoloxe misoli ane. La sou mi'asixe no ovu tavuna tava'u no xalee mulai ili'i ne Veteli. La sou mimoxo'u ovu ne lexe, “Ovu Tavuna Sou Tama”.

9 No tauu ie ane Iakovo molu ne Mesopotamia sou mulivu mune'e ne Kanani, la Lataua mupala'a noxou la. Xe muavuti la mualusou aloxo 'o,

10 ^b “Ualasine lexe Iakovo, ia usokou ane vaimomo 'o mo ulai avile ili'i ne,
imoxoine lexe Isilaeli.”
La sou mumoxo'u lexe Isilaeli.

11 ^cXe Lataua muavuti la muvikalanu aloxo 'o la,

“Eni Lataua, eni xavileli misevile.
Eni emasaxa lexe napalaane'i ta 'iline tapiena,
mo sou nini naxali loxo ta mitema tapiena 'ilusune'i
mo ta tatila sou xalexalee tuatuala kalumo.
12 Lia ano 'o eni elosi'a Avalaamu ilou Aisaki tei,
ia vaimomo 'o eni a'italonu ulai noxine.
Mo ta 'iline ilo'a ta xasixasine mo ta 'ilusulusuneni ane ipaa ili'i ne,
eni aitixa'a lia ano 'o kalumo.”
13 Lataua muvivikalanu aloxo ne, xe mukalu la sou mulai. 14 ^dXe Iakovo muavuti la mutulusou lavo'o vile veveeni ane ilou Lataua mitutulu mivivikala ne. Xe mukalu la munixi'u uaini ilou ovu vile lexaxu teitexi no latanu lavo'o ne, sou Lataua miu. 15 La sou xalee lia se ane ane'i Lataua ilou Iakovo mitutulu sou mivivikala no anu ne, anu Iakovo mumoxo'u lexe Veteli.

16 Xe ili'i la sou anu Iakovo ilo'a ta minuminu mivulasou tuala ne Veteli ne sou lexe isuku ulai no tuala tila ne Epurata. Milutu mo a imumuamua'i sou ilalai ne Epurata mo ixali uao, ia voxo sou lavulo'o noxie Lakeli sou ivo'o muxalisie. No voxo ane ne, ane mixamuli navunavu toxoxa'a misevile. 17 Xe sema e mine'e sou mipaipixone ne, mivikalane aloxo 'o, “Taneni kalaua mo na'ume mamu xo 'iline mulu vile la 'a.” Sema ne imasaxa lexe ixolixoline Lakeli aloxo ne la ua, ane misuxula'e sou soli. 18 Xe misuxula'e kaluxusou ne la, ane mimoxo'u 'ilie keakea ne ualasou. Mimoxo'u lexe Beni-Oni. Xe ili'i la, la momu mumoxo'u ualasou lexe Beniamini. 19 Mino'e Lakeli milai sou mi'asixe no vote'i pa'umolu ulai ne Epurata ne. Vaimomo 'o ne ilemolu tuala ne Epurata ne lexe Vetiliemu. 20 Xe ili'i la sou mulue mutulusou lavo'o vile veveeni no lousie ne. Mo lavo'o ne a uai sio, mo mutalo vaimomo 'o. 21 Mi'asixe Lakeli mo mitulusou lavo'o vile veveeni no lousie loxo ne xe mukalu, la misolo muamua'i noxi'a mulai sou milai mixali ne Migudalu Ederu. Xe misuku mulai sevile la, la sou milai mi'ilii tuala sou mitulu tani sou mixolu no anu. 22 ^eNo tauu ie ane Iakovo muxolu no lia xalee ane ne, la Luven anu Iakovo 'olu vile mulai noxie Vila anu Iakovo semau vile. Xe ili'i la sou ane'i mia'alou momu.

Ioxe, anu Iakovo ta 'olu mavulovexa mulelia tamei.

23 Ta 'olu ane noxie Lea ualaualasi'a ano, laposalaxu ane Luven ka Simeoni, ka Levi, ka Iuda, ka Isikali, ka Sevulon. 24 Xe ta 'olu ane noxie Lakeli ualaualasi'a ane, Iosepu ilou Beniamini. 25 Xe ta 'olu ane noxie Vila, sema sou xaixai noxie Lakeli, ualaualasi'a ane Den ilou Napitali. 26 Xe ta 'olu ane noxie Silipa, sema sou xaixai noxie Lea, ualaualasi'a ane Xati ilou Aselu. Ane'i Iakovo ta 'olu 'o ne ta neni'a mivo'one'i ane ne Mesopotamia.

27 ^fMixoxoolu ne xe Iakovo muavuti la mulai noxou momu Aisaki ne Mamule. Tuala ne Mamule ne 'alai ne Ebulon tualasi'a Avalaamu ilou 'olu Aisaki mixolu no anu tei. 28 Aisaki mumaulixu tauu ie loxo itemaxu ta'uve mo mavulovexa muxatele tatalu (180). 29 Xe no voxo anu sou usoli la sou mulapunu tauuxu alaxu vilesisi loxo 'osi, la musivita. La uleenu mulu'elai no tualasi'a ta mitema sou soli. Xo anu aululu mine manina. La sou ta 'olu Esau ilou Iakovo mi'asixu.